Dowladda Federaalka iyo Isbaheysiga Asmara oo isku afgartay in Safiirada Shisheeye laga saaro Shirka.

(Jabuuti, June 05,  2008 Ceegaag Online)

Dowladda Federaalka Soomaaliya iyo Mucaaradkeeda ee ku shirsan Magaalada Jabuuti ee xarunta dalka Jabuuti ayaa isku afgartay in safiirada shisheeye laga saaro shirka uga socda magaalada Jabuuti kadib markii uu shirka maalintii shalay hareeyey khilaaf ka dhashay ka qeybgalka shirka ee safiirka dowladda Ethiopia u fadhiya dalka Jabuuti.

Wakiilka gaarka ee Qaramada Midoobay Ahmedu Ould Abdallah ayaa sheegay in la xaliyey khilaafkii yaraa ee shalay dhacay, isagoo intaa raaciyey in dhinacyada isku haya siyaasadda ay isku afgarteen in dhamaan safiirada dowladaha shisheeye ee ka qeyb galayey shirka goobta uu shirka ka socda laga saaro.

Wakiilka Qaramada Midoobay ayaa shalay illaa xalay kulamo gaar gaar ah la qaadaneyey labada dhinac, waxaana uu ugu dambeyn ku guuleystay in uu ka dhaadhiciyo labada dhinac in ay muhiim tahay in shirka la sii amba qaado.

Guddoomiye ku xigeenka isbeheysiga dib u xoreynta C/raxmaan Janaqow ayaa sheegay in iminka la xaliyey khilaafka islamarkaana ay rajeynayaan in ay sii amba qaadaan shirka qeybihiisa kale.

Wuxuu intaas raaciyey in khilaafka uu markii hore ka dhashay safiirka Ethiopia oo goobta soo galay islamaraana aaney suuragal aheyn in dad ay cadowtooyo kala dhexeyso ay goob qura wada fariistaan sida uu hadalka dhigay.

Maalintii shalay ayey xubnaha mucaaradka ah ee isbeheysiga dib u xoreynta isaga bexeen hoolkii uu ka socday siminaarka kadib markii uu goobta soo galay safiirka Ethiopia u jooga dalka Jabuuti.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com