Ergadii ka socotay Mucaaradka ayaa ka baxay madashii shirka kadib markii Safiirka Ethiopia ee Jabuuti uu goobta soo galay

(Jabuuti, June 04,  2008 Ceegaag Online)

Shirkii Dowladda Federaalka iyo Mucaaradka uga socday dalka Jabuuti ayaa madashii uu ka dhacay waxaa isaga baxay Ergadii ka socotay xubnaha isbeheysiga Mucaaradka kadib markii goobta uu soo galay danjiraha Dowladda Ethiopia u fadhiya Dalka Jabuuti.

Xubnaha mucaaradka ayaa dalbaday in Danjiraha dowladda Ethiopia laga saaro madasha oo uu ka socday Seminar haddii kale ay isaga baxayaan goobta, hase ahaatee wasiirka dib u heshiisiinta dowladda Federaalka ayaa difaacay Danjiraha Ethiopia taas oo keentay in Ergadii mucaaradku madasha shirka isaga baxaan.

Wakiilka gaarka ah ee Qaramada Midoobay ayaa markii mucaaradku ka bexeen shirka waxa uu bilaabay dhexdhexaadin, iyadoo wararka laga helayo dalka Jabuuti ay sheegayaan in mucaaradku ku adkeysanayaan haddii aan goobta shirka laga saarin danjiraha Ethiopia in aaney ka qeyb galeynin siminaarka.

Safiirka oo markii dambe tagay Hotel-ka ay ku jiraan Ergada laba dhinac ayaa kulan la qaatay Mas'uuliyiin ka tirsan Dowladda Jabuuti iyo kuwa Qaramada Midoobay, waxa uuna safiirku sheegay inuu Xaq u leeyahay inuu Madasha Shirka ka qayb galo maadaama lagu marti qaaday Cid ka hor istaagikarana aysan jirin.

Ergada mucaaradka ee ka qeyb galeysa shirka ayaa ku adkeysaneya in danjiraha Ethiopia aanu soo gali karin madasha shirka haddii kale aaney ka qeyb gali doonaan wada hadalka, waxaana iminka soconaya dadaalo uu wado wakiilka gaarka ah ee Qaramada Midoobay taas oo la xiriirta sidii uu goobta mar kale ugu soo celin lahaa xubnaha mucaaradka ah.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com