Ra’iisal wasaare Nuur Cadde oo u faahfaahiyay Golihiisa Wasiirada Heshiiskii Jabuuti ay kula galeen Mucaaradka.

(Hargeysa, June 19,  2008 Ceegaag Online)

Ra'iisal Wasaaraha dawladda Federaalka Somaliya Nuur Xasan Xuseen Cadde ayaa maanta u faah faahiyay Golihiisa wasiirada heshiiskii dhawaan Magaalada Jabuuti ay kula gaareen Mucaaradka Asmara iyo qaabka loo meel marin karayo.

Ra'iisal Wasaare Nuur Cadde waxaa uu xusay in heshiiskaasi uu ahaa mid taariikhi ah isla markana ka tarjumaya dadaalka xukuumadiisa ee u tafa xeydatay heshiisinta iyo ku dhaqaaqida isu keenida siyaasiyiinta Soomaaliyeed.

Xubnaha Golaha wasiirada ayaa su'aalo ka weydiiyay Ra'iisal Wasaaraha qodobada heshiiska qaarkood ee mugdiga uu ku jiro waxaana uu qiray in wax waliba ay ka fiirsadeen ka hor intii aysan saxiixin sidaasi darteedna ay sugayaan natiijooyin wanaagsan.

Waa kulankii labaad mudo todobaad gudihiisa ah oo Golaha wasiirada ee ku sugan magaalada Muqdisho ay ka hadlaan arrimaha shirka Jabuuti,iyadoona dhawaan ay soo saareen baaq ku aadan in la meel mariyo go'aanadii Dowladda Federaalka Soomaaliya iyo Mucaaradkeedu gaareen.

www.ceegaag.com

webmaster@ceegaag.com