Culumaa’udiinka Xarayaale oo Dowladda KMG ugu baaqay in ay Xoriyadiisa dib ugu soo celiso Mu’adinkii Masjidka Xarayaale Sheekh Xuseen Muuse Hiiraabe.

(Muqdisho, June 16,  2008 Ceegaag Online)

Culumaa'udiinka ku dhaqan deegaanka Xarayaale ee degmada Wardhiigley ayaa ugu baaqay dowladda KMG ah in ay dib xoriyadiisa ugu soo celiyaan mu'adinkii masaajidka xaafadda Xararyaale Sheekh Xuseen Muuse Hiraabe kaas oo todobaadyo ka hor ay ciidamada dowladdu ka kexeysteen masaajidka Xararyaale.

Sheekh Cumar Max’uud Wardheere oo kamid ah culumaa'udiinka masjidka Xararyaale ayaa dowladda KMG ah ka dalbaday in ay sii daayaan mu'adinka masjidka Xararyaale iyo dad kale oo la xiran, isagoo sheegay in sheekhaasi uu ahaa nin aan arrimaha siyaasadda lug ku laheyn.

"Wuxuu u xiran ciidamada dowladda oo si sharci darro ah uga kexeystay masjidka Xarayaale, waxaan ku baaqayaa in xoriyadiisa dib loogu soo celiyo" ayuu yiri Sheekh Cumar Maxamuud Wardheere.

Sheekh Xuseen Muuse Hiraabe iyo 5 kale oo ku sugnaa masjidka Xararyaale ayey ciidamada dowladdu kexeysteen, iyadoo warar soo baxaya ay sheegayaan in uu ku xiran yahay xarunta Villa Soomaaliya inkasta oo aan weli arrintaas la xaqiijin.

Ciidamada dowladda iyo kuwa Ethiopia ayaa badanaa kexeysta oo si sharci darro ah xabsiga u dhiga culumaa'udiinka Soomaaliyeed iyo macalimiinta dugsiyada qur'aanka, waxaana xabsiyada ay maamulaan labadaasi dhinac ka buuxa culumaa'udiin badan oo si sharci darro ah loo xirxiray

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com