Dagaal la isku adeegsanayo hubka noocyadiisa kala duwan ayaa ka socda Qeybo ka mid ah Magaalada Muqdisho.

(Muqdisho, June 12,  2008 Ceegaag Online)

Dagaalka ayaa la sheegay in uu dhashay kadib markii ciidamo ka tirsan kuwa Dowladda oo ay kaabayaan ciidamo Ethiopain ah ay xireen wadada isku xirta garoonka Muqdisho illaa isgoyska KM4 halkaas oo subaxnimadii hore ee saaka ay isku gadaameen.

Kooxaha hubeysan ee ka horjeeda ayaa la sheegay in ay weerar qosheysan ku qaadeen, iyadoo uu halkaas ka qarxay dagaal fool ka fool ah oo la isku adeegsaday hubka noocyadiisa kala duwan.

Lama oga khasaaraha ka dhashay dagaalka oo ahaa mid ku faafay deegaano kale, waxaana la sheegay in ciidamada Dowladda ay hub aad u culus adeegsanayeen.

Dhinaca kale dagaal khasaase dhaliyey ayaa galinkii dambe ee shalay waxa uu ka dhacay qeybo kamid ah degmooyinka Yaaqshid iyo Hurwaa, iyadoo inta la xaqiijiyey dagaalkaas ay ku dhinteen seddax qof halka ay ku dhaawacmeen 7 qof kuwaas oo deegaanadii ay deganaayeen ay ku habsadeen madaafiic.

Dagaalka shalay ka dhacay deegaanadaas ayaa ka dambeeyey markii xoogagga hubeysan ay weerar ku qaadeen fariisimaha ay ciidamada Ethiopia ku leeyihiin deegaanadaas, waxaana madaafiic ay ku jawaabeen ciidamada Ethiopia ay waxyeelo gaarsiisay dad rayid ah.

Si kastaba ha ahaatee dagaalada ka dhacaya magaalada Muqdisho ayaa imaanaya xilli magaalada Jabuuti ay heshiis ku kala saxiixdeen Dowladda Federaalka Soomaaliya iyo isbeheysiga dib u xoreynta Soomaaliya.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com