Diyaaradaha Dagaalka ee Kenya oo maalintii labaad dul heehaabaya Deegaanka Dhoobleey.

(Dhoobley, June 04,  2008 Ceegaag Online)

Diyaaradaha dagaalka dalka Kenya oo joog hoose ku duulaya ayaa maalintii labaad dul heehaabaya deegaanka Dhoobley oo ku yaala xadka ay wadaagaan dalalka Kenya iyo Soomaaliya.

Wararka laga helayo deegaanka Dhoobley ayaa sheegaya in ciidamada cirka dalka Kenya oo adeegsanaya diyaaradaha qumaatiga u kaca ay maalintii labaad howlgallo ka wadaan deegaanka Dhoobley iyo deegaanada ku dhow dhow halkaas oo ay ka baadi goobayaan sida la sheegay mid kamid ah gawaari ay lahaayeen ciidamadooda jooga xadka oo ay kooxo Soomaali ah ka qaateen maalmo ka hor.

Saraakiil ka tirsan ciidamada Kenya ayaa ku hanjabay in ay talaabo milatari ka qaadi doonaan deegaanka Dhoobley dadka ku dhaqan haddii aaney si deg deg ah dib ugu soo celin gaari dhawaan laga qaatay.

Diyaaradaha dul heehaabaya deegaanka Dhoobley maalintii labaad oo ah kuwo joog hoose ku duulaya ayaa si dhab ah loo ogeyn cidda ay baadi goobayaan, hase ahaatee ilo lagu kalsoon yahay ayaa sheegay in howlgalkaan uu salka ku hayo gaarigii dhawaan laga qaatay ciidamada xadka Kenya.

Guddoomiyaha deegaanka Dhoobley Cali dheere ayaa shaaciyey in kulan uu la qaatay mas'uuliyiin ka tirsan Kenya ay uga dalbadeen in uu si deg deg ah ugu keeno gaarigii laga qaatay, hase ahaatee uu u balan qaaday in uu gaarigaas keenayo.

Kooxo hubeysan oo Soomaali ah ayaa maalmo ka hor weerar waxa ay ku qaadeen ciidamada ilaalada u ah xadka uu dalka Kenya kala wadaago dhinaca Soomaaliya kuwaas oo dilay 4 amid ah ciidamada ilaalada xadka Kenaya islamarkaana qaatay gaari ay lahaayeen ciidanka Kenya.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com