Euro 2008 oo Xulalka Jarmalka iyo Croatia ay xalay Guulo soo hooyay.

(Vienna, June 09,  2008 Ceegaag Online)

Xulka Qaranka Jarmalka ayaa xalay 2-0 ku garaacay xulka Qaranka ee Dalka Poland, Ciyaaryahan Lukas Podolski  oo Asal ahaan u dhashay Poland iyadoo waalidkii dhalay labaduba ay ahaayeen Reer Poland hase yeeshee ay u soo qaxeen dalka Jarmalka markii uu Podolski ahaa 2 jir, ayaa dhaliyey Labada gool oo ay ku badiyeen dalka Jarmalka isagoo kan hore baas wanaagsan ka helay saaxiibkiis Miroslav Klose oo sidoo kale isna Asalkiisu Polandees ah daqiiqadii 20-aad ee ciyaarta halka goolka kalena oo dhaliyey 20 daqiiqo markii ay ka harsaneyd dhamaadkii ciyaarta.

Guushan Jarmalka ayaa aheyd toodii ugu horeysey mudo 12 sano ah iyagoo markii ugu dambeysey ee ay badiyaan kulan ka tirsan koobka qaramada Yurub uu ahaa Finalkii 1996 markii ay 2-1 koobka uga qaadeen dalka Jamhuuriyada Czech Republic.

Wadanka Jarmalka wuu ku guuldareystey tartamadii 2000 iyo 2004 inuu soo dhaafo wareega 1aad iyagoo aan badinin mid ka mid ah kulamadii ay ciyaareen.

Ciyaartii kale ee xalay dhacday ayaa waxay dhex martay Xulalka Croatia iyo Austria oo ah wadanka labaad ee Marti galiyay Ciyaaaraha Qaramada Yurub. Waxaana 1:0 ku adkaaday Xulka Croatia iyadoo Goolka qudha uu u daliyay Xulka Croatia Ciyaaryahanka lagu Magacaabo Luka Modric

Labada dal ee sida wada jirka ah u marti gelinaya tartankan qaramada Yurub ayaa kulankoodii ugu horeeyey min 1-0 lagaga itaal roonaadey iyadoo ay ku adkaan doonto sidii uu midkood usoo gaari lahaa wareega labaad ee tartankan maadaama kulamo adag ay usii dhiman yihiin.

www.ceegaag.com

webmaster@ceegaag.com