Golaha amaanka oo isku raacay in Maraakiib dagaal loo diro xeebaha Soomaaliya.

(New York, June 03,  2008 Ceegaag Online)

Golaha Amaanka ayaa isku raacay in maraakiib dagaal loo diro xeebaha dalka Soomaaliya oo kamid noqday xeebaha ugu khatarta badan caalamka halkaas oo ay ku sii baahayaan afduubka ay kooxo burcad badeed Soomaali ah u geysanayaan maraakiibta shisheeye.

Qaraar ay soo bandhigeen Dowladdaha Mareykanka iyo France oo ay golaha amaanku ka doodeen ayey markii dambe isku raaceen in wax laga qabto xeebaha dalka Soomaaliya si loola dagaalamo khatarta kooxaha burcad badeedda ah ay ku hayaan Maraakiibta Shisheeye.

Golaha amaanka ayaa isku raacay in muddo lixbilood ah ay maraakiibta dowladaha shisheeye ka howlgalaan xeebaha dalka Soomaaliya kadib markii go'aan tirsiguusu ahaa 1,816 ay ansixiyen xubnaha golaha amaanka.

Golaha amaanka ayaa u fasaxay dowladaha shisheeye ee ay maraakiibta dagaal ka joogaan xeebaha dalka Soomaaliya in ay la dagaalamaan kooxaha burcad badeedda Soomaalida ah iyagoo isticmaalaya maraakiibta iyo diyaaradaha dagaalka.

Xeebaha dalka Soomaaliya ayaa kooxo burcad badeed Soomaali ah waxa ay ku afduubtaan maraakiibta shisheeye iyagoo markaa dabadeedna ka qaata lacago madax furasho ah oo aad u fara badan, waxaana taasi ay keentay in maraakiibta shisheeye ee badeecadaha u soo daabulaya Soomaaliya ay ku soo dhiiran waayaan xeebaha dalka Soomaaliya.

Bishii la soo dhaafay oo kaliya kooxaha burcad badeedda ah waxa ay afduubteen maraakiib shisheeye oo ka badan 4 markab kuwaas oo qaarkood weli ku jira gacanta kooxaha burcad badeedda ah halka qaarka kale lagu sii daayey lacago madax furasho ah oo ay bixiyeen.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com