Goobihii ay shalay dagaaladu ka dhaceen ayaa saaka degan, waxaana dib u bilowday ganacsigii iyo isu socodkii gaadiidka iyo dadweyanaha.

(Muqdisho, June 09,  2008 Ceegaag Online)

Waddooyinka soo gala suuqa weyn ee Bakaaraha oo shalay ahaa kuwo xirnaa ayaa saaka furan, waxaaana sidoo kale dadka iyo gaadiidkuba ay isticmaalayaan wadada wadnaha oo kamid aheyd goobihii ay shalay dagaaladu ka dheceen.

Waxyeelada ka dhalatay dagaalkii shalay ayaa ah kuwo sii kordhaya, iyadoo dhaawacyo hor leh laga geynayo goobaha caafimaadka, waxaana sidoo kale wararku sheegayaan in meydad cusub laga helay goobihii shalay ay dagaaladu ka dheceen.

Guddoomiyaha ganacsatada suuqa Bakaaraha ayaa sheegay in khasaare nafeed iyo mid hantiyeedba uu soo gaaray suuqa Bakaaraha, isagoo sheegay in duqeyn aan horey loo arag suuqaasi shalay loo geystay.

Inkasta oo ay iminka xaaladdu deggan tahay ayaa haddana markasta la filan karaa dagaallo kale oo dhaca maadaama ciidamada dowladda KMG ay weli ku sugan yihiin deeganada qaar ee ay shalay dagaaladu ka dheceen.

Inta la og yahay dad ka badan 20 qof ayaa ku geeriyooday inka badan 100 qof oo dhaawac ahna waxaa la dhigay isbitaalada Magaalada Muqdisho kuwaas oo ku waxyeeloobay dagaaladii shalay ka dhacay degmooyinka Wardhiigley iyo Howlwadaag oo labaduba ku dhaw Suuqa ganacsiga ugu weyn Soomaaliya ee Bakaaraha.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com