Hogaamiye sare oo ka tirsan Ururka Al-qaacida ayaa ku booriyay xoogaga hubeysan in ay dagaal kala hortagaan Ciidamada Ajanabiga.

(Somalia, June 23,  2008 Ceegaag Online)

War ka soo baxay Ururka Al-Qaacida ayaa loogu baaqay dagaal yahanada Soomaaliyeed in ay dagaal kala hortagaan ciidamada UN-ka ee Soomaaliya la keenayo sida uu sheegay afhayeen u hadlay ururka Al-Qaeda

Cajal Video ah oo ay soo saareen ururka Al-Qaeda ayaa lagu soo bandhigay Website ku hadla afka ururka Al-Qaacida, waxaana canjalka ka soo muuqday Abuu Yaxya Al-Libi oo ka tirsan ururka Al-qaacida.

"Waa in dagaal yahanada Soomaaliyeed ay dagaal kala hortagaan ciidamada ajnabiga ah ee Soomaaliya imaanaya, dagaal kala hortaga cid kasta oo shisheeye ah oo Soomaaliya timaada" ayuu yiri Abuu Yaxya Al-Libi.

Wuxuu ku booriyey dagaal yahanada Soomaaliyeed inaysan aqbalin wax ka yar dowlad Islaami ah oo ay ka dhisaan dalka Soomaaliya, isagoo intaa raaciyey in ay xoojiyaan dagaalka ay kula jiraan shisheeyaha dalka qabsaday iyo kuwa iminka loo soo wado.

Si kastaba ha ahaatee hadalka ka soo baxay ururka Al-Qaeda ayaa imaanaya xilli beesha caalamku ay dadaal xooggan ugu jirto sidii ciidamo caalami ah loo keeni lahaa dalka Soomaaliya.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com