Holland oo Guuldaradii ugu xumeyd dhabarka u saartay Faransiiska iyo Buffon oo Italy badbaadiyay.

(Vienna, June 13,  2008 Ceegaag Online)

Xulka Holland ayaa 4-1 ku garaacay Qaranka Faransiiska  kulan aad u xiisa badnaa oo ka tirsanaa Group C una soo baxay wareega labaad ee tartanka Ciyaaraha Qaarada Yurub ee Euro 2008.

Xulka Faransiiska  oo Sideed sano ka hor ku guuleystay koobkii Yurub ee lagu qabtay Dalalka Holland iyo Belgium  isla markaana ka mid ahaa dalalka loo saadaalinaayey iney ku guuleysanayaan koobkan ayaa naxdin iyo qarow ku bilaabay markii kulankoodii 2aad lagaga naxsadey 4 gool oo aad u qurux badnaa.

Goolasha waxaa u dhaliyay Qaranka Holland Ciyaaryahanada da’da yar ee D. Kurt, R.V. Persie, A.Robben iyo Ciyaaryahanka Sanadka W.Sneijder halka faransiiska Goolka Caatada ah uu u dhaliyay T.Henry.

Guuldarada soo wajahday Faransiiska  waa tii ugu weyneyd in muddo ah oo ay kala kulmaan Tartankan iyadoo aan hore Qaranka Faransiiska lagaga badin kulanka 2aad ee Qaramada Yurub

Tani waa Guul Taariikhi ah, waxaan si xarago leh uga adkaanay Qaranka Faransiiska, waa qarankii qaaday Koobka Aduunka iyo Euro 2000 waxaana u gudubnay Wareega Labaad ayuu yiri Tababaraha Xulka Holland Van Basten oo farxad aan xad laheyn ka Muuqatay wajigiisa.

Faransiiska waxey kulankooda 3aad la ciyaari doonaan Xulka Talyaaniga maalinta Salaasadda iyadoo Holland ay isla maalintaas la ciyaarayaan Xulka Romania.

Dhinaca kale Xulalka Talyaaniga iyo Romania ayaa 1:1 isla dhaafi waayay Ciyaar aad uxiiso badneed waxaa Goolka ku horeeyay Xulka Romania waxaana u saxeexay Ciyaaryahanka A.Mutu halka C.Panucci uu Gool barbar dhac u dhaliyay Xulka Talyaaniga.

Dadka ka faalooda ciyaaraha ayaa saadaaliyay in Xulalka Faransiiska iyo Talyaaniga aysan u gudbi doonin Wareega labaad ee Tartanka Euro 2008.

www.ceegaag.com

webmaster@ceegaag.com