Hotel Nasiye oo lagu qabtay Kulan looga hadlayay nabadgalyada Deegaanka Soomaalida Ethiopia.

(Jig-Jiga, June 18,  2008 Ceegaag Online)

Maanta galinkii hore, waxaa Hotel Nasiye ee ku yaalla badhtamaha magaalada Jig-Jiga lagu qabtey shir ay isugu yimaadeen hoggaamiye-dhaqameedka deegaanka Soomaalida, iyo masuuliyiin sare oo ka tirsan xukuumada deegaanka Soomaalida. Kulanka oo ka dhacey Hotel Nasiye, ayey u jeedadiisu ahayd sidii ay maamulka deegaanka iyo odayaashu tashi uga wada yeelan lahaayeen isla markaana uga wada shaqeyn lahaayeen sugida Nabadgalyada Deegaanka.

Masuuliyiinta shirka timid, oo kala ahaa, Hoggaanka Nabad-galyada, Cabdi Maxamuud Cumar (Cabdi Ileey) iyo Guddoomiye ku xigeenka Xisbiga Daa’uud Maxamed Cali, ayaa odayaasha uga warbixiyey, dhibaatooyinka ay nabad-galyo xumada ka jira qeybo badan oo ka mid ah Ismaamulka Deegaanka iyo sida ururada nabad-diidka ahi ay caqabad weyn ugu yihiin horumarka bulshada deegaanka. Hoggaanka Nabad-galyada ayaa odayaasha ka codsadey ineysan marna la gabannin wixii talo iyo tusaale ah ee ay Xukuumada Siinayaan.

Odayaasha ayaa dhankooda, si aad ah uga mahad celiyey in ay masuuliyiinta dawladu ugu yimaadaan la tashi, isla mar ahaantaana waxay ballan qaadeen iney dawlada kala shaqeynayaan sidii looga adkaan lahaa kooxaha carqalada ku ah nabad-galyada. Gaba-gabadii shirka waxaa ka soo qayb galey culimaa’udiin aad looga yaqaano deegaanka Soomaalida, oo kulanka ku soo xidhey dar Daaran iyo duco.

www.ceegaag.com

webmaster@ceegaag.com