Iska Hor imaad ka dhacay magaalada Muqdisho iyo Madaafiic lagu garaacay Suuqa Bakaaraha.

(Muqdisho, June 08,  2008 Ceegaag Online)

Dagaal aad u culus oo la isku adeegsanayo hubka noocyadiisa kala duwan ayaa ka dhacay nawaaxiga Suuqa Bakaaraha, iyadoo dagaalkan ay barbar socdaan duqeyn sidii Roobka oo kale uga socda Suuqa Bakaaraha oo ah suuqa ugu weyn Soomaaliya.

Iska hor imaadkan ayaa waxaa uu bilowday markii Ciidamada Itoobiya iyo kuwa Dowladda isku fidiyeen Waddooyinka soo gala Suuqa bakaaraha, sida wadada Soddonka iyo Wadnaha ayaa kooxo hubeysan waxay kala hortageen Ciidamadaas dagaal ku bilawday goos goos kaas oo markii dambe isku bedelay dagaal faraha looga gubtay.

Inta la og yahay dagaalkan ayaa waxaa ku dhintay ku dhawaad 12 qof oo dhamaantood ay ahaayeen dad rayid oo afar ka mid ah ay yihiin Dumar, wallow uu dagaalka socda haddana lama ogaan karo tirada guud ee dhimashada dagaalkan ka dhashay.

Isbitaalada Madiina iyo Keysanay ayaa la geeyay dhaawacyo fara badan sida ay sheegayan wararka laga helayo goobahaas Caafimaad.

Bartamaha Suuqa Bakaaraha ayaa la sheegaya in lagu arkay meydad fara badan oo waddooyinka yaala gaar ahaan agagaarada Shirkadaha Isgaarsiinta, ee ku yaala Gudaha Suuqa Bakaaraha.

www.ceegaag.com

webmaster@ceegaag.com