Khasaaraha ka dhashay Bam gacmeed lagu tuuray goob aflaanta lagu daawado Magaalada Gaalkacyo ayaa sii korodhay.

(Gaalkacyo, June 03,  2008 Ceegaag Online)

Faah faahin dheeraad ah ayaa ka soo bexeysa khasaaraha ka dhashay bam gacmeed xalay fiidkii hore lagu tuuray goob aflaanta lagu daawado oo ku taala magaalada Galkacyo ee xarunta gobolka Mudug halkaas oo dadna ay ku dhinteen kuwa kale ay ku dhaawacmeen.

Inta la xaqiijiyey labo qof ayaa ku geeriyootay tiro ka badan 7 qofna waa ay ku dhaawacmeen kadib markii kooxo aan la garan ay bam Nooca gacanta laga tuuro ku weerareen mid kamid ah goobaha aflaanta laga daawado ee magaalada Galkacyo ee xarunta gobolka Mudug.

Qaraxa ayaa ka dhacay bartamaha magaalada Galkacyo gaar ahaan meel ay dadku aad ugu badnaayeen, Ma jiro illaa iyo iminka cid sheegatay in ay ka dambeysay qaraxaas oo wararka laga helayo magaalada Gaalkacyo ay sheegayaan in uu sii kordhayo khasaaraha dhimasho iyo dhaawac ee uu geystay.

Dadka ku dhaqan magaalada Gaalkacyo ayaa si weyn u hadal haya qaraxa lala beegsaday shineemada oo ahaa mid ku cusub magaalada Galkacyo, waxaana dadka reer Galkacyo ay cabsi iyo wel wel ka muujiyen qaraxyo kan ka horeeyey oo ka dhacay magaalada Gaalkacyo todobaadyadii la soo dhaafay.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com