Kooxo taabacsan Maxkamadaha oo dagaal kula wareegay xerada tababarka ciidamada Manaas ee Gobolka Bay.

(G.Baay, June 03,  2008 Ceegaag Online)

Kooxo taabacsan maxkamadaha islaamka ayaa dagaal kula wareegay xerada tababarka ciidamada Manaas oo ku taala gobolka Bay qiyaastiina magaalada Beydhabo u jirta 45 KM.

Iska horimaad dhimasho iyo dhaawac dhaliyey ayaa la sheegay in uu halkaas ku dhexmaray ciidamadii ku sugnaa xerada iyo Kooxo taabacsan  Maxaakiimta Islaamka.

Afhayeen u hadlay maxkamadaha oo la yiraahdo C/raxiin Ciise Cadow ayaa xaqiijiyey in ciidamadoodu ay weerar ku qaadeen xerada Manaas islamarkaana ay dagaal la galeen ciidamadii ku sugnaa xerada halkaasna ay dhimasho iyo dhaawac ka dhalatay.

Ma jiro saraakiil ka tirsan ciidamada Dowladda oo ka hadlay iyadoo sidoo kalena maamulka gobolka Bay aanu weli ka hadlin, hase ahaatee wararka laga helayo gobolka Bay ayaa sheegaya in dagaal uu halkaas ka dhacay.

Xaalad kacsanaan ah ayaa ka jirta gobolka Bay gaar ahaan deegaanada ku dhow xerada Manaas, iyadoo abaabulo ciidan laga soo sheegayo qeybo kamid ah gobolka Bay.

Dagaalyahanada Al-shabaab iyo kuwa Maxkamadaha ayaa hadba goob weerar Gaadmo ah ku qaada iyagoo dagaallo la gala ciidamada Dowladda iyo ciidamada Ethiopia oo siyaasad ahaan ay ka horjeedaan.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com