Madaafiic lagu garaacay Garoonka Diyaaradaha xili Madaxweyne Yuusuf oo ka dhoofayay.

(Muqdisho, June 01,  2008 Ceegaag Online)

Kooxaha hubeysan ee ka horjeeda siyaasadda dowladda ayaa madaafiic aan tiradooda la heynin ku weeraray garoonka magaalada Muqdisho xilli wafdi uu hogaaminayo Madaxweyne C/llaahi Yuusuf ay ka dhoofayeen garoonka diyaaradaha ee Aadan Cadde International Airport ee magaalada Muqdisho.

Madaafiicda lagu weeraray garoonka Muqdisho waxaa wehliyey dagaal fool ka fool ah oo dhexmaray ciidamada dowladda KMG iyo kooxaha ka horjeeda dowladda kaas oo ka dhacay qeybo kamid ah wadada Maka Al-mukarama.

Lama oga khasaaraha ka dhashay dagaalka oo rasaasta la isku adeegsanayey si weyn looga maqlayey qeybo badan oo kamid ah magaalada Muqdisho.

Ma jiro wax war ah oo ka soo baxay dhinaca Dowladda KMG oo ku saabsan dagaalka saakay ka qarxay wadada maka Al-mukarama oo ah waddo ay si weyn u isticmaalaan madaxda dowladda KMG.

Aroornimadii hore ee saaka ayey aheyd markii ciidamo ka tirsan Dowladda KMG ay xireen wadada isku xirta xarunta Madaxtooyada illaa garoonka magaalada Muqdisho halkaas oo ay ka dhoofayeen wafdi uu hogaaminayey Madaxweyne C/llaahi Yuusuf Axmed.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com