Madaxda Isbaheysiga dib u xoreynta oo kulamo kula leh magaalada Nairobi mas’uuliyiin ka tirsan Midowga Yurub.

(Nairobi, June 17,  2008 Ceegaag Online)

Guddoomiyeyaasha golaha fulinta iyo kan golaha dhexe ee isbaheysiga dib u xoreynta Somalia Sheekh Shariif Sheekh Sheekh Axmed iyo Shariif Xasan Sheekh Aadan ayaa kulamo kula leh magaalada Nairobi ee dalka Kenya mas’uuliyiin kala socota ururka midowga Yurub oo sida la sheegay markii horeba ku casuumay halkaasi.

Kulanka labada dhinac dhexmaraya oo ah mid xasaasi ah oo albaabadu u xiran yihiin ayaan si rasmi ah loo shaacin wax looga wada hadlayo, hase ahaatee warar hoose oo laga helayo xubno ka tirsan isbaheysiga dib u xoreynta ee ku sugan magaalada Nairobi ayaa sheegay in labada dhinac ay isla faaqidayaan arimo ku saabsan sidii loo hirgelin lahaa heshiiskii dhowaan ka dhacay magaalada Jabuuti iyo kaalinta midowga Yurub kaga aadan hirgelinta heshiiskaas

Sidoo kale, wararka ayaa sheegaya in mas’uuliyiinta isbaheysiga dib u xoreynta Somalia ee ku sugan magaalada Nairibo ayaa kulan ballaaran la yeeshay qaar ka mid ah culumaa’udiinka waaweyn ee dalka Kenya, waxayna culumaa’udiinku sheegeen iney garab taagan yihiin halganka ay isbaheysiga dib ugu xoreynta ugu jiraan sidii dalka Somalia looga saari lahaa ciidamada Itoobiya umadda Soomaaliyeedna uga tashan laheyd  aayaheeda, waxaana kulankaasi looga dooday qaabka nabad loogu soo dabaali lahaa Somalia.

www.ceegaag.com

webmaster@ceegaag.com