Madaxweyne Yuusuf oo ka qeyb galaya Shir Sanadeedka Madaxda Qaarada Africa oo Maalinta Bari ah ka furmidoona Dalka Masar.

(Nairobi, June 29,  2008 Ceegaag Online)

Madaxweynaha Dowladda Federaalka Soomaaliya Mudane C/llaahi Yuusuf Axmed iyo wafdi uu horkacayo ayaa ka qeyb galaya shirka madaxeedka qaaradda Afrika ee ka furmaya dalka Masar halkaas oo ay ku sii qulqulayaan madaxda dalalka qaaradda Afrika.

Madax kala duwan oo ka socda qaaradda Afrika ayaa iminka u socdaalaya dalka Masar halkaas oo uu ka furmayo shir sanadeedka dalalka ku yaala qaarada Africa.

Madaxweyne Yuusuf ayaa iminka ku sugan magaalada Nairobi kadib markii uu shalay ka dhoofay garoonka magaalada Muqdisho si uu uga qeyb galo shir madaxeedka dalalka qaaradda Afrika.

Shirka oo looga hadli doono xaaladaha qaaradda Afrika oo ay qeyb ka tahay xaaladda Soomaaliya ayaa la filayaa in Madaxweynaha Soomaaliya Mudane C/llaahi Yuusuf Axmed uu qudbad uu kaga hadlayo xaaladaha ka jira dalka Soomaaliya halkaas ka jeediyo.

Wasiirka Arrimaha dibadda dalka Soomaaliya iyo wafdi uu horkacayo oo ka sii horeeyey madaxweyne Yuusuf ayaa la filayaa inay ku soo dhaweeyaan garoonka madaxweynaha.

Shir Sanadeedka Qaaradda Africa ayaa waxaa horyaala qodobo badan oo taabanaya xasaraadaha ka jira dalalka qaaradda Africa, waxaana tan ugu weyn ay tahay xaaladaha ka aloosan dalka Zimbabwe.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com