Madaxweyne Yuusuf iyo wafdi uu hogaaminayo oo maanta u duulay magaalada Addis-ababa ee xarunta Dalka Ethiopia

(Muqdisho, June 12,  2008 Ceegaag Online)

Wafdi uu hogaaminayo Madaxweyne C/laahi Yuusuf Axmed ayaa saaka ka duulay garoonka diyaaraha Muqdisho iyagoo u kicitimay magaalada Addis-ababa oo wafdiga Madaxweyanaha ay kaga qeyb galayaan shir sanadeedka Ururka IGAD.

Wafdiga madaxweyanaha oo ka koobnaa Wasiiro iyo xildhibaano ka tirsan Dowladda ayaa ka qeyb galaya shir sanadeedka Ururka IGAD oo ka dhacaya Magaalada Addis-ababa oo xarunta Dalka Itoobiya.

Wafdiga Madaxweyane C/llaahi Yuusuf ayaa ka hor intii aaney ka duulin garoonka Muqdisho waxaa kooxaha hubeysan ee ka horjeeda Dowladda ay madaafiic ku weerareen garoonka inkastoo ay ku dhaceen Madaafiicdaasi xaga badda Madiina iyo Afisyooni ee ku dhaw Garoonka Aadan Cadde ee magaalada Muqdisho.

Lama sheegin waxyeelo madaafiicdaas ay geesteen maadaama hoobiyaashu bilaabmeen markii Wefdiga madaxweynaha diyaaradii qaaday ay cagaha dhulka ka qaaday.

Kooxaha dowladda ka horjeeda ayaa badanaa madaafiic ku duqeeya garoonka Muqdisho marka ay mas'uuliyiinta sarsare ee dowladda duulayaan ama soo dagayaan, iyadoo dabayaaqadii bishii ina dhaaftay ay aheyd markii sidaan oo kale madaafiic lagu duqeeyey garoonka oo uu ka duulay madaxweyne Yuusuf

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com