Markab Dagaal oo uu Leeyahay Mareykanka ayaa badbaadiyay Tahriibayaal isugu jira Soomali iyo Ethiopian.

(Bahrain, June 10,  2008 Ceegaag Online)

Markab dagaal oo ay leedahay dowladda mareykanka ayaa badbaadiyey tahriibayaal isugu jira Soomaali iyo Ethiopian kuwaas oo doonidii ay saarnaayeen ay cilad ku qabsatay biyaha badda ee u dhexeeya dalalka Yemen iyo Soomaaliya.

War ay saraakiil ka tirsan ciidamada mareykanka ka soo saareen saldhigga ay ku leeyihiin dalka Baxreyn ayey ku sheegeen in mid kamid ah maraakiibtooda dagaal oo la yiraahdo USS Russel uu badbaadiyey 70 qof oo tahriibayaal ah.

Tahriibayaashii saarnaa doonta ayaa caawinaad ka dalbaday markabka, iyadoo ciidamadii saarnaa markabka dagaal ay markiiba u soo gurmadeen tahriibayaashii saarnaa doonida oo ay badbaadiyeen.

Wararka ayaa sheegaya in qaar kamid ah dadkii saarnaa doonta ay ku dhex geeriyoodeen doonta ka hor intii aaney ciidamada mareykanku badbaadinin.

Dadka la badbaadiyey ee saarnaa doonida tahriibka ah ayaa qaarkood la sheegay in ay iminka ku sugan yihiin caafimaad darro soo wajahday kadib markii ay muddo ku jireen badda.

Dadka Tahriibka ee ku qulqulaya dalka Yemen ayaa sii kordhaya iyadoo iminka dalka Yemen ay ku sugan yihiin qaxooti fara badan oo dalkoodii isaga cararay kadib markii ay ku baaheen dagaalada iyo colaada aan dhamaadka laheyn

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com