QM ayaa shaaca ka qaaday in dad ka badan 40 qof oo shacab ah ay ku dhinteen dagaaladii Khamiistii ka dhacay magaalada Muqdisho

(Nairobi, June 21,  2008 Ceegaag Online)

War laga soo saaray xafiiska Qaramada Midoobay u qaabilsan arrimaha bini'aadanimada ayaa shaaca looga qaaday in dad ka badan 40 qof ay ku dhinteen dagaalkii Khamiistii ka dhacay Magaalada caasimada ah ee Muqdisho.

War bixinta todobaadla ah ee Qaramada Midoobay ayaa lagu sheegay in dagaalkii u dhexeeyey ciidamada dowladda iyo kuwa Itoobiya oo isgarabsanaya iyo kooxaha ka horjeeda uu geystay khasaare nafeed oo aad u xooggan, islamarkaana ay ku nafwaayeen dad ka badan 40 qof oo dhamaantood ah shacab.

Qaramada Midoobay waxay war bixinta ay ka soo saartay dhimashada dadka rayidka ah ay ku sheegtay in xaafado ay dad shacab ah deganaayeen madaafiic lagu duqeeyey taas oo sii kordhisay dadkii ku dhintay dagaalka.

War biixnta ayaa lagu sheegay in kumanaan shacab ah la dilay, kumanaan kalena laga barakiciyey aqaladii ay deganaayeen kuwaas oo inta badan ku yaalay magaalada caasimadda ah ee Muqdisho.

Dagaalkaa maalintii khamiista aheyd ka dhacay deegaanada ku dhaw wadada warshadaha gaar ahaan Guulwadayaasha iyo xaruntii hore ee wasaaradda Gaashaandhigga ayaa ciidamada Ethiopia waxa ay u adeegsadeen madaafiic ay ku duqeeyeen xaafadaha Muqdisho taas oo sababtay in dad fara badan ay ku geeriyoodaan halka kuwa dhaawac ahna la dhigay isbitaalada Muqdisho

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com