Saraakiil ka tirsan Ciidanka Booliska Dowladda Soomaaliya ayaa waxa uu siminaar uga furmay magaalada Kampala.

(Kampala, June 16,  2008 Ceegaag Online)

Gen. Yuusuf Dhuumaal oo ah madaxa hogaanka ka hortagga dambiyada ee ciidanka Booliska Dowladda Federaalka Soomaaliya ayaa sheegay in 91 sarkaal oo ka tirsan ciidanka booliska oo laga soo kala xulay gobolada dalka Soomaaliya uu siminaar aqoon kororsi dhinaca ciidanka ah uga furmay magaalada Kampala ee xarunta dalka Uganda.

Wuxuu sheegay Gen. Dhuumaal in saraakiisha la bari doono mudada uu siminaarku socda nidaamka CID-da, maamulka dhaqaalaha iyo xiriirka dibadaha.

"Siminaarku waa mid kor loogu qaadayo tayada saraakiisha ciidanka booliska, waxaana uu socon doonaa muddo 8 isbuuc ah" ayuu yiri Gen. Yuusuf Dhuumaal madaxa ka hortagga dambiyada ee ciidanka booliska.

Wuxuu intaas raaciyey in hay'adda UNDP ay qeyb lixaad leh ka qaadan doonto siminaarka inta uu socdo, iyadoo saraakiil ka socda dalka Uganda ay casharada bixin doonaan.

Ma ahan markii ugu horeysay ee saraakiil ka socota ciidanka booliiska aqoon kororsi ay u aadaan dalal dibadda ah, iyadoo inta badan ay jiraan siminaaro aqoon kororsi ah oo ay dowladda KMG ah ugu deeqaan dalal kala duwan.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com