Saraakiisha ciidanka Puntland ee magalada Galkacyo ayaa gacanta ku dhigay nin wata waxyaalaha Qarxa.

(Galkacyo, June 21,  2008 Ceegaag Online)

Wararka laga helayo magaalada Galkacyo ayaa tibaaxaya in ciidanka booliska magaalada Galkacyo ay gacanta ku dhigeen nin wata walxaha qarxa sida ay sheegeen saraakiisha ciidanka booliska.

Taliyaha ciidanka Booliska maamulka Puntland ee magaalada Gaalkacyo Col. C/rashiid Cadceed ayaa warbaahinta u sheegay in ay gacanta ku dhigeen ninkaas, kadib markii ay howgallo xiriir ah ka sameeyey magaalada Galkacyo.

Wuxuu intaas raaciyey in ciidanka amaanku ay howlgallo xiriir ah sameeyeen si ay gacanta ugu soo dhigaan waxa uu ugu yeeray dad amni darro ku abuuray magaalada Galkacyo.

"Waanu wadeynaa howlgalka illaa aanu ka xaqiijino amaanka magaalada, waanu la dagaalameynaa kooxaha amaan darida ku abuuraya magaalada Galkacyo" ayuuu yiri Col. C/rashiid Cadceed taliyaha ciidanka Puntland ee magaalada Galkacyo.

Hadalka taliyaha ayaa ku soo beegmaya xilli habeen hore uu qarax dhimasho iyo dhaawac sababay oo ka dhacay magaalada Gaalkacyo ee maamulka Goboleedka Soomaaliyeed ee Puntland.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com