Ururada Bulshada oo QM ugu baaqay in Cunaqabateyn adag la saaro Cidii ka hortimaada wada hadalada Jabuuti.

(Jabuuti, June 04,  2008 Ceegaag Online)

Ururada Bulshada rayidka ah ee goob joogga u ah shirka dib u heshiisiinta ee ka socda dalka Jabuuti ayaa Qaramada Midoobay ugu baaqay in ay cuna qabateyn dhinac walba ah ku soo rogaan kooxdii ka hortimaada wada hadalada ka socda dalka Jabuuti.

War qoraal ah oo ay magaalada Jabuuti ka soo saareen inka badan 9 Urur oo goob joog u ah shirka Jabuuti ayey ku sheegeen in ay tahay in cuna qabateyn lagu soo rogo dhinicii ka horyimaada in wada hadal lagu dhameeyo dhibaatooyinka ka aloosan dalka Soomaaliya.

Ururada bulshada rayidka ah ayaa waxa ay sheegeen in talaabadaan ay tahay midda kaliya ee wax looga qaban karo dhinacyada isku haya siyaasadda dalka Soomaaliya islamarkaana loo baahan yahay in cadaadis xooggan la saaro.

Waxay qoraalkooda golaha amaanka uga codsadeen in ay ka shaqeeyaan qaabkii ciidamada Ethiopia looga saari lahaa gudaha dalka Soomaaliya si loo afmeero dhibta ka jirta dalka Soomaaliya.

Bulshada rayidka ee iminka ku sugan dalka Jabuuti ayaa guud ahaan beesha caalamka ku booriyey in ay u istaagaan sidoo xal waara loga gaari lahaa arrimaha Soomaaliya oo muddo badan ay ka jireen khasalaase siyaasadeed iyo isjiid-jiid u dhexeeya dhinacyada Soomaalida ah ee ku kala aragtida duwan arrimaha dalka Soomaaliya.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com