Waxaa magaalada Jabuuti lagu soo xiray siminaarkii halkaas uga socday ergada Dowladda KMG iyo Isbaheysiga Asmara.

(Jabuuti, June 07,  2008 Ceegaag Online)

Siminaarka oo maalmo halkaas uga socday Dowladda Federaalka Soomaaliya iyo Isbaheysiga Dib u Xoreynta Soomalaiya ayaa waxaa casharo ka bixinayey quburo ka socda Qaramada Midoobay kuwaas oo mudadii uu siminaarka socday si weyn diiradda ugu saarayey dhinaca Bini'aadanimada.

Siminaarka ayaa horudhac u ahaa shirka dib u heshiisiinta uga socda dalka Jabuuti Dowladda KMG iyo xubnaha mucaaradka ah.

Wararka laga helayo dalka Jabuuti ayaa sheegaya in ay socdaan kulamo gaar gaar ah oo looga gol leeyahay sidii la isugu soo dhaweyn lahaa dhinacyada ku shirsan dalka Jabuuti.

Wakiilka gaarka ah ee Qaramada Midoobay ayaa magaalada Jabuuti ka wada kulamo uu ku doonayo in uu isugu soo dhaweeyo Dowladda iyo mucaradkeeda, waxaana wararku ay sheegayaan in uu kulamo aan la shaacin la qaatay madaxda ugu sarsareysa ee dhinacyada dowladda iyo mucaaradka ee ku sugan dalka Jabuuti.

Inkasta oo la soo gaba gabeeyey siminaarka ayaa haddana waxaa lagu xusuustaa mudadii uu socday markii ergada mataleysa mucaaradka ay isaga baxeen hoolka kadib markii uu goobta soo galay danjiraha Ethiopia u jooga dalka Jabuuti halkaas oo muran iyo isqabqabsi uu ka dhashay.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com