Xasan Turki ayaa qaadacay heshiiskii ay kala saxiixdeen Dowladda KMG iyo Mucaaradka.

(Dhoble, June 11,  2008 Ceegaag Online)

Sheekh Xasan C/laahi Xirsi (Xasan Turki) oo kamid ah hogaamiya ciidan ee ugu waaweyn maxkamadaha Islaamka ayaa qaadacay heshiiskii ay dowladda KMG iyo mucaaradkeeda ku kala saxiixdeen magaalada Jabuuti ee xarunta dalka Djibouti.

Xasan Turki oo shir jaraa'id idaacadaha Muqdisho ugu qabtay qadka fooneeyahay loo yaqaan ayaa sheegay in aanu ogoleyn heshiiskaas islamarkaana ay sii wadayaan dagaalka ay kula jiraan ciidamada Ethiopia oo uu xusay in dalka looga saari karo qori caaradiis.

Wuxuu tilmaamay in heshiiska aaney ku cadeyn in ciidamada Ethiopia ay si dhaqso ah uga baxaan dalka Soomaaliya oo uu sheegay in ay duulaan ku qabsadeen.

"Waanu wadi dagaalka illaa aan dalka ka xoreyno cadowga, heshiiskaana inagu waxba nagama quseeyaan" ayuu yiri Sheekh Xasan Turki oo la hadlayey warbaahinta.

Wuxuu sheegay in uu ugu baaqayo guud ahaan shacabka Soomaaliyeed in ay dagaal la galaan ciidamada Ethiopia oo uu xusay in ay si gardarro ah ku qabsadeen dalka Soomaaliya, xalka kaliya ee dalka looga saari karana uu yahay dagaal.

Marka laga soo tago Sheekh Xasan Daahir Aweys waa mas'uulkii labaad oo ka tirsan maxkamadaha Islaamka ee qaadacay heshiiskii Jabuuti lagu saxiixay, waxaana sidoo kale jira shaqsiyaad kale oo sidaan oo kale ka biyo diiday heshiiskaas

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com