10 qof ayaa ku geeriyootay  20 kalana way ku dhaawacmeen dagaal beeleed maanta ka dhacay magaalada Gaalkacyo.

(Gaalkacyo, March 17, 2008 Ceegaag Online)

Dagaal aad u qaraar ayaa maanta ka dhacay Koonfur Bari ee Magaalada Gaalkacyo kaasoo  sababay dhimashhada tobon qof oo isugu jira dad rayid ah iyo kooxihii dagaalamayay, dagaalka ayaa salka ku haya muran ka dhashay lahaanshaha dhul ku yaala nawaaxiga garoonka diyaaradaha ee Magaaladaasi.

Goobaha caafimaadka ayaa xaqiijiyay inuu jiro dhaawacyo dad oo halis ah kuwaaso aan waxba looga qaban Karin magaalada Gaalkacyo ,iyadoo xaalada labo ka mid ah dhaawacyada ay halis ku jirto.

Iska horimaadka ayaa bilaawaday saaka markii maleeshiyo hubaysani ay dumiyeen guri ku yaala dhulka lagu muransan yahay taasoo keentay in la isku habar wacdo oo dagaalkaas uu dhaco.

Maamulka magaalada Gaalkacyo ayaa la shegay inay dadaal ugu jiraan sidii loo qaboojin lahaa xiisadan waxayna wada hadal dhexmaray go’aan ku gaareen in la soo afjaro dagaalada dhiiga sababay iyadoo lala kaashanayo waxgaradka labada dhinac ee dagaalamay.

Magaalada Gaalkacyo ayaa mudooyinkan ahayd meel aad u xasiloon oo ay ku yarayeen dagaalada iyo iska horimaadyo u dhaxeeya dadka wada dega taasoo ay u suurta galisay in magaalada xudun u tahay ganacsiga dalka.

dagaalkan ayaa noqonaya mid abuura jawi colaadeed oo ku timaada nabadii lagu wada deganaa,waxayse ku xiran tahay sida waxgaradku ugu guntadaan in laga hortago cooladaha iyo wax kasta oo wax udhimaya daganaanshaha Gobolka.

www.ceegaag.com

webmaster@ceegaag.com