3 qof oo uu ku jiro Xildhibaan ka tirsan Barlamaanka oo ku dhaawacmay rasaas lagu furay gaari ay saarnaayeen oo marayey degmada Wanla-weyn.

(Wanla-weyn, March 30, 2008 Ceegaag Online)

Mid kamid ah xildhibaanada Barlamaanka Dowladda ayaa ka mid noqday illaa seddex qof oo ku dhaawacmay rasaas ay kooxo hubeysan ku fureen gaari ay saarnaayeen oo marayey meel ku dhoiw degmada Wanla-weyn ee gobolka Sh/hoose.

Xildhibaanka dhaawacmay oo la yiraahdo Sheekh Jaamac Xaaji Xuseen ayaa kamid ahaa xubno ka tagay magaalada Muqdisho oo ku sii jeeday magaalada Beydhabo oo xarun u ah xubnaha Barlamaanka Dowladda Federaalka Soomaaliya.

Ma cadda ujeedada ay kooxahaas hubeysan rasaasta ugu fureen gaariga uu la socday xildhibaanka, lamana oga in kooxaha rasaaseeyey gaariga ay ahaayeen kooxaha Dowladda ka horjeeda ama ay ahaayeen maleeshiyo hubeysan oo jidgooyo dhigtay wadada.

Si dhab ah looma oga inta uu gaarsiisan yahay dhaawaca gaaray xildhibaan Jaamac Xaaji Xuseen, waxaana warar aan la xaqiijin ay sheegayaan in dhaawaca soo gaaray xildhibaanka uu yahay mid aad u fudud.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com