75-qof tahriibayaal Soomaali ah oo ku dhintay xeebaha dalka Yemen iyadoo weli aan nolo iyo geeri lagu heynin tiro kale.

(Yemen, March 29, 2008 Ceegaag Online)

In ka badan 75-qof tahriibayaal Soomaali ah ayaa ku naf waayey biyaha badda ee dalka Yemen markii dadkaas lagu daadiyey badda dalka Yemen.

Wararka laga helayo dalka Yemen ayaa sheegaya in tirada dadkii ku dhintay xeebaha badda Yemen ay sii kordhayaan iyadoo la helayo meydad hor leh oo ay soo caarisay badda, waxaana inta la hubo la xaqiijiyey dhimashada dad gaaraya 75-qof.

"Waxaa weli la la' yahay tiro kale oo dad ah kuwaas oo ay baddu qaaday, nolol iyo geeri midna dadkaas laguma hayo, waxayna kamid ahaayeen dad badan oo labadii maalin ee u dambeysay si tahriib ah ku soo galayey dalka Yemen" ayuu yiri qunsulka Soomaaliya u fadhiya dalka Yemen Xuseen Xaaji Axmed.

Wuxuu intaa raaciyey qunsulku in qaar kamid ah dadkii badbaaday lagu baxnaaniyo gobolka Abyan halkaas oo xarun ay ku leedahay Hay'adda dhakhaaqtiirta aan xuduudda laheyn.

Dadka dhintay iyo kuwa badbaaday ayaa la sheegay in ay dooni ka soo qaaday magaalada dhinaca Bari ku taala ee Bosaaso kadibna ay dadkii watay doonida ay si bareer ah dadka ugu amreen in ay biyaha badda ku daataan halkaas oo ay ka dhalatay dhimasho badan.

Wararka laga helayo dalka Yemen gaar ahaan gobolka Abyan ayaa sheegaya in labadii maalin ee ina dhaaftay ee halkaas gaareen in ka badan 450-tahriibayaal Soomaali ah kuwaas oo badankood u gudbay magaalada Sanca ee xarunta dalka Yemen.

Kumanaan Soomaali ah ayaa inta badan ku dhinta badda u dhexeysa dalalka Yemen iyo Soomaaliya waxaana dadkan ay ka cararayaan dhibaatooyinka aan dhamaadka laheyn ee ku heysta gobolada koonfureed ee dalka Soomaaliya halkaas oo ay ka jiraan dagaallo aan dhamaad laheyn.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com