Ra'isul wasaare Nuur Cadde iyo wafdi uu hogaaminayo oo u duulay magaalada Riyaadh ee dalka Sacuudiga

(Riyadh, March 30, 2008 Ceegaag Online)

Ra'isul wasaaraha Soomaaliya Nuur Xasan Xuseen (N. Cadde) iyo wafdi uu hogaaminayo ayaa gaaray magaalada Riyaadh ee dalka Sacuudiga kadib markii ay ka dhoofeen dalka Kenya.

Wafdiga Nuur Cadde ee gaaray magaalada Riyaadh ee dalka Sacuudiga ayaa marti-qaad ka helay madaxda dalka Sacuudiga, waxaana magaalada Riyaadh uu kula kulmi doonaan madaxda boqortooyada dalka Sacuudiga.

Wafdiga Nuur Cadde oo ay ku jiraan Wasiiro ka tirsan Xukuumadiisa ayaa la filayaa in ay madaxda dalka Sacuudiga kala hadlaan arrimo dhinacyo badan leh oo ay ku jirto sidii ay Sacuudigu taageero ula garab istaagi lahaayeen shacabka Soomaaliyeed ee dhibaatooyinka isbiirsaday ay heystaan.

Ra'isul wasaare Nuur Cadde ayaa iyadoo la hadal hayo in uu magaalada Nairobi kula kulmayo kooxaha mucaaradka ah waxa uu safar ugu ambabaxay dalka Sacuudiga halkaas oo kulamo kula qaadan doono mas'uuliyiin ka tirsan xukuumadda Sacuudiga.

Waa booqashadii ugu horeysay ee Ra'isul wasaare Nuur Cadde uu ku tago dalka Boqortooyada Sacuudiga tan iyo markii loo magacaabay xilka Ra'isul wasaaranimo.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com