Banaanbax balaaran oo looga cabanayo sare ukaca qeybaha kala duwan maciishadda iyo diidmada lacagaha duugga ah ayaa maanta ka dhacay magaalada Muqdisho

(Muqdisho, March 18, 2008 Ceegaag Online)

Dibadbaxaan oo ay dhigayeen dad far badan ayaa looga cabanayey qiimo kororka ku yimid noocyada kale duwan ee maciishadda, waxaana dibadbaxayaashu ay ku dhawaaqayeen erayo ay ku cambaareynayaan ganacsatada oo ay sheegeen in ay yihiin kuwa sicirbararka ku haya shacabka Soomaaliyeed.

Dibadbaxaan oo ka dhacay degmooyinka Wada-jir iyo Dharkeynley ayey shacabkii dhigayey waxa ay si weyn u muujinayeen sida ay uga xun yihiin in ganacstadu ay qiimo koror ku sameeyaan waxyaabaha daruuriga u ah nolosha aadanaha gaar ahaan raashinka.

Dadka dibaxbayaasha ah ayaa u badnaa dadka danyarta ah ee saameynta ugu horeyso ay ku yeelatay sicibararka ka jira dalka gaar ahaan magaalada caasimadda ah oo maalmahaan si weyn looga dareemayo sicirbararka.

Waxgarad iyo abwaano ayaa ka qeyb galay dibadbaxa iyagoo tilmaamay in shacabka danyarta ah loo turo oo aan si arxan darro ah loola dhaqmin, islamarkaana aan qiimo koror joogta ah aan lagu sameyn waxyaabaha daruuriga u ah nolosha aadanaha gaar ahaan cuntada.

Si kastaba ha ahaatee dibadbaxanaa ayaa imaanaya xilli magaalada caasimadda ah ee Muqdisho iyo gobolada dalka Soomaaliya ay ka jiraan sicirbarar xooggan oo saameeyey nolosha kumanaan dad ah oo u badan dan yar aan awood laheyn.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com