Banaanbax rabshado wata oo xalay ka dhacay degmada Kaaraan.

(Muqdisho, March 19, 2008 Ceegaag Online)

Banaanbax rabshado xambaarsan loogana horjeeday sicirbararka iyo diidmad lacagaha duugga ah ayaa xalay ka dhacay degmada Kaaraan iyo qeybo kamid ah degmada Yaaqshid.

Kumanaan dad ah oo careysan ayaa isu soo baxaas ku muujiyey sida ay uga xun yihin sicirbararka ku yimid nuucyada maciishadda iyo diidmada ay ganacsatadi ka muujiyeen lacagaha duugga ah, iyagoo isu soo baxa ka bilaabay degmada Kaaraan islamarkaana soo gaaray degmada Yaaqshid.

Dadka dibaxbaxayaasha ah ayaa intii ay waddooyinka marayeen waxa ay sameynayeen rabsahado iyagoo burburiyey qaar kamid ah gawaari ku jirtay garaashyo ku yaala hareeraha wadada laamiga ah, waxaana markii dambe dadkaas kala buriyey ciidamo ka tirsan dowladda oo ku sugnaa isgoyska Fagax ee magaalada Muqdisho.

Qaar kamid ah dibadbaxayaasha ayaa u dhaqaaqay dhinaca wadada wadnaha iyaga oo socod ku gaaray isgoyska Siinaay, lama sheegin dadkaas in ay khasaare gaarsiiyeen gaadiid iyo weliba hanti taalay deegaanadaas.

Maalintii shalay ayey aheyd markii dad ka xun sicirbararka maciishadda ku yimid iyo diidmada lacagaha duugga ah ay dibadbax ka dhigeen degmoyinka Wada-jir iyo Dharkeynley, iyadoo guddomiyaha degmada Wada-jir uu halkaas ka sheegay in talaabo sharciga waafaqsan laga qaadi doono ciddii diida lacagaha duugga ah.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com