Biyo la’aan  aad u daran oo laga soo sheegayo degmada Ceegaag iyo degaannada ku xeeran.

(Ceegaag, March 17, 2008 Ceegaag Online) 

Wararka naga soo gaadhaya degmada Ceegaag ee gobolka Sool ayaa tibaaxaya in biyo la’aan aad u darani ka jirto degmadaas iyo nawaaxigeeda. Guddoomiyaha  degmada Ceegaag  Cabdi Xaaji Cali Cilmi (Cabdi Riigle)oo ay weheliyeen  40 xubnood oo ka tirsan maamulka iyo waxgaradka degmada Ceegaag ayaa saaka jir jaraa’id ku qabtay xarunta degmadaasi. Guddoomiyaha oo ka warbixiyay xaaladda abaareed ee ka jirta  degaannada  Yeyle, Horufadhi, Ceegaag, Oog, Guumays iyo Ceeldhaab ayaa sheegay in haddii aan si dhakhso leh loogu soo gurman dadwaynaha ku dhaqan degaankaas in xeryo qaxooti ah loo yagleeli  doono dhawaan.

Guddoomiyaha ayaa ugu baaqay Hay’adaha caalamiga ah iyo maamulka Soomaaliland oo ah maamulka kaliya ee iska xilsaara taakulaynta dadwaynaha degaankaas in ay si deg dega ah gurmad biyo iyo cuntaba ula soo gaadhaan dadkaas ay abaaruhu waxyeelleeyeen.  

Cabdi Xaaji Cali ayaa tibaaxay in maamul ahaan intii karaankooda ah ay dadaaleen iskuna dayeen in ay daboolaan baahida xagga biyaha ee ka jirta Ceegaag iyagoo kaashana qaar ka mid ah qurbajoogta balse ay hadda ka fursanwayday in aan adduunka u sheegnno abaartan ku baahday degaannadaas aan kor ku soo sheegnay.

"Laba booyadood oo ay noo iibiyeen qurbajoogta reer Ceegaag ayaa u dhaamiya dadwaynha degmada oo tiradooda lagu qiyaasay in ka badan 5,000 oo qof iyo illaa 10,000 oo xoolo ah taas oo aan habayaraatee dabooli karin baahida biyood ee ka jirta degaankan" ayuu yidhi guddoomiyuhu.

Waxaa iyana shirkaas jaraa’id ka hadlay xubno ka tirsan maamulka iyo waxgaradka degmada Ceegaag oo ay ka mid ahaayeen Qaasim Maxamuud Goorxungawrac, Rashiid Faarax Isaxaaq, Jaamac Weerar Maxamuud, Maxamed Cabdi Giir, Cabdi Maxamed Cawl, Cabdillaahi Jaamac Caliyare (Koofiyad), Axmed Maxamed Awdaan, Baashe Waranle, Hurre Mire Cabdi, Siciid Cabdi Giir (Qalbi) iyagoo dhammaantood walaac ka muujiyay biyo la’aanta soo wajahday iyo nabaadguurka ka jira degaankaasi. 

Ugu danbayn waxaa waxgaradka  degmadu u soo jeediyay Qurbajoogta degaanka Ceegaag in ay u soo gurmadaan dadkooda abaaruhu waxyeelleeyeen iyagoo tibaaxay in maanta foostada biyaha ah ay ka marayso Ceegaag $7 doollar taas oo aysan awoodin boqolkiiba 95% dadwaynaha ku dhaqan degmadaas.

www.ceegaag.com

webmaster@ceegaag.com