Madaxweyne C/llaahi yuusuf oo maanta cafis u fidiyey maxaabiis ku jirtay xabsiga dhexe ee Magaalada Muqdisho.

(Muqdisho, March 31, 2008 Ceegaag Online)

Madaxweynaha Dowladda Federaalka Soomaaliya C/laahi Yuusuf Axmed ayaa maanta casif u fidiyey qaar kamid ah maxaabiistii ku jirtay xabsiga dhexe ee magaalada Muqdisho kadib kulan uu la qaatay xubno ka tirsan Barlamaanka Soomaaliya oo ka soo jeeda gobolka Galguduud.

Xubnaha Barlamaanka ee uu la kulmay Madaxweyne Yuusuf ayaa waxa ay kala ahaayeen xildhibaan Maxamed Jaamac Furux, Xil. Maxamed Maxamuud Guuleed (Gacmadheere) Xil. Cali Calas Qaarey iyo maamulaha dekadda magaalada Muqdisho Siciid Siyaad Shirwac.

Kulanka ay yeesheen Madaxweyne C/llaahi Yuusuf iyo xubnaha Barlamaanka  oo aan si hoose loo ogeyn waxa looga hadlay ayuu sheegay afhayeenka Dowladda Cabdi Xaaji Goobdoon in kulanka uu ahaa mid ay joogeen wasiiro ka tirsan dowladda islamarkaana uu madaxweyne Yuusuf cafis ugu fidiyey tiro kamid ah maxaabiistii ku jirtay xabsiga dhexe ee magaalada Muqdisho.

Maxaabiista uu maanta cafiska u fidiyey Madaxweyne Yuusuf ayaa gaarayey 7 maxbuus, waxaana maxaabiistaan lagu qabtay magaalada Muqdisho kal hore, lamana oga in cafiska uu madaxweynuhu u fidiyey maxaabiista iyo kulanka ay wada qaateen isaga iyo xubnaha Barlamaanka uu isku hadaf ahaa.

Madaxweyne C/laahi Yuusuf ayaa dhowr jeer cafis u fidiyey maxaabiis ku xirneyd xabsiga dhexe ee magaalada Muqdisho, waxaana cafiska madaxweynaha si weyn u soo dhaweeyey ehelada maxaabiista cafiska loo fidiyey.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com