Ciidamada DF ayaa xalay howlgallo Amaanka lagu sugayo ka sameeyey Magaalada Baydhabo ee xarunta Gobolka Bay.

(Baydhabo, March 17, 2008 Ceegaag Online)

Howlgalkan oo ahaa mid ay fuliyeen Ciidamada Amaanka Magaalada Baydhabo ayaa lagu soo qabqabtay tiro dad ah oo lagu tuhmayo in ay ka dambeeyaan falalka amaan darri ee ka jira magaalada Beydhabo.

Sargaal ka tirsan ciidamada amaanka magaalada Beydhabo ayaa sheegay in howlgalkaas u dhacay si wanaagsan isla markaana ay ciidamadu gacanta ku dhigeeyn dad badan oo lala xiriirinayo falalka ka dhaca magaalada Beydhabo.

Wuxuu sheegay in dadkaas lagu xiray jeelka magaalada Beydhabo isla markaana baaritaan lagu wado si loo xaqiijiyo in ay falalka amaan darri ay ku lug leeyihiin, isagoo intaa ku daray in la sii deyn doono ciddii aaney ku caddaan arrimahaas.

"Waan sii wadeynaa howlgalada illaa amaanka si wanaagsan oo la isku haleyn karo loo sugo isla markaana aaney magaaladu ka dhicin falal amaan darri" ayuu yiri sargaalka oo ka hadlayey howlgalka ay ciidamadu ka sameeyeen magaalada Beydhabo.

Howlagalaan ayaa imaanaya iyadoo maalmo uun ka hor markii magaalada Beydhabo lagu toogtay askari ka tirtsan ciidamada dowladda, illaa iyo haddana ma jirto cid loo qabtay dilka askarigaas marka laga reebo dadka la tuhmayo ee ay xalay ciidamadu soo qabqabteen.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com