Ciidamada Ethiopia oo isku balaariyey suuqa Xoolaha iyo dagaal ka qarxay deegaankaas.

(Muqdisho, March 19, 2008 Ceegaag Online)

Ciidamada Ethiopia ayaa saakay isku balaariyey qeybo kamid ah degmada Huriwaa ee magaalada Muqdisho, iyadoo markaas kadib ay dagaal la galeen kooxaha joogitaankooda ka horjeeda.

Wararka laga helayo degmada Huriwaa ayaa sheegaya in ciidamo ka tirsan kuwa Ethiopia oo ka kala baxay saldhigyada Maslax iyo Warshadda Baastada ay isku fidiyeen wadada isku xirta xerada Maslax illaa Ex-control Balcad, dabadeedna la sheegay in uu halkaas ka qarxay dagaal fool ka fool ah.

Wararka ayaa sheegaya in kooxaha ka horjeeda joogitaanka ciidamada Ethiopia ay weerar ku qaadeen ciidamada Ethiopia oo si raxan-raxan ah u socda, iyadoo markaas kadibna la sheegay in dagaalku uu sii xoogeystay.

Lama sheegi karo khasaaraha ka dhashay dagaalka iyo haddii dad rayid ah wax ku noqdeen, waxaana saaka gebi ahaanba aanan shaqeynin gaadiidka deegaankaas isaga gooshi jiray iyadoo sidoo kalena ay dhamaan irdaha u laaban yihiin goobaha ganacsi ee ku yaala deegaankaas.

Warar goor dhow na soo gaaray ayaa sheegaa in uu qaboobay dagaalka isla markaana hadda la maqlayo rasaas goos goos ah oo ay ridayaan ciidamada Ethiopia oo iyagu ku sugan wadada laamiga ah ee isku xirta xerada Maslax illaa xarunta warshadda Baastada oo ay saldhigyo ciidan ku leeyihiin.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com