Ciidamadii Ethiopia-ka ahaa ee dhawaan gaaray magaalada Marka oo halkaas ka guuray una wareegay degmada Qoryooley

(Qoryooley, March 27, 2008 Ceegaag Online)

Ciidamadii Ethiopia-ka ahaa ee dhawaan fariisinka ka dhigtay magaalada Marka ayaa halkaasi maanta isaga baxay iyagoo u weecda degmada Qoryooley ee isla gobolka Sh/hoose.

Wararka laga helayo magaaada Marka ayaa sheegaya in ciidamada Ethiopia ee dhawaan halkaasi gaaray ay faarujiyeen goobtii ay dageen iyagoo wajahay dhinaca degmada Qoryooley, waxaana wararka laga helayo magaalada Marka ay sheegayaan in saacado kahor ay ciidamadaas ka ambabexeen halkii ay ka deganaayeen magaalada Marka.

Ciidamadaan ayaa la sheegay in markii ay ka tagayeen deegaanka Ceel-jaalle oo ay maalmo uun ka hor dageen ay iyagoo lugeynaya oo ay gaadiidka dagaalka daba socdaan si feejignaan ah ugu socdeen wadada.

Wararka hadda naga soo gaaraya degmada Qoryooley ayaa sheegaya in ciidamadii ka tagay degmada Marka ay iminka gaareen degmada Qoryooley halkaas oo ay ku biireen ciidamo kale oo Ethiopi-ah oo horey ugu sugnaa degmadaas.

Lama oga sababta ay ciidamada Ethiopia u faarujiyeen deegaanka Ceel-jaalle ee gobolka Sh/hoose oo dhawaan uun ay gaareen.

24-kii bishaan ayey cutubyo kamid ah ciidamada Ethiopia gaareen magaalada Marka ee xarunta gobolka Sh/hoose halkaas oo saraakiisha ciidamada hogaamineysa ay kulamo kula qaateen maamulka gobolka iyo odayaasha deegaanka inkasta oo ay maanta ka guureen halkaas.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com