Ciidamo Itoobiyan ah oo aad u hubeysan ayaa maanta Saldhig ka sameystay Degmada Diinsoor ee Gobolka Baay.

(Diinsoor, March 17, 2008 Ceegaag Online) 

Ku dhawaad 20 Baabuur oo ay dul saaran yihiin Ciidamada  Itoobiya ayaa gaaray Magaalada Diinsoor ee Gobolka Baay halkaas oo toddobaadyadii aynu soo dhaafnay dhawr jeer gacan ku haynteeda la wareegeen xoogaga al Shabaab ee dagaalka kula jira Dowladda Federaalka Soomaaliya  iyo Ciidamada dalka Itoobiya.

Gudaha magaalada Diinsoor, Buuraha waa weyn ee ku wareegsan Magaaladaas ayay saldhigyo ka dhigteen Ciidamada Itoobiyanka ah ee gaaray halkaas sida uu sheegay goobjoogo ku sugan magaaladaas oo aan qadka telefoonka kula xiriirnay.

Ma cadda sababta ay Ciidamada Itoobiya u tageen Magaaladaas balse waxaa la fahamsan yahay in tagitaanka Ciidamada Itoobiyaanku salka ku hayso oo kaliya iyagoo ku raad jooga kooxihii todobaadyadii aynu soo dhaafnay qabsaday Magaaladaas ee uu hor kacayay Afhayeenka Kooxda Al-Shabaab Sheekh Mukhtaar Roobow.

Sidoo kale lama oga inay muddo dheer halkaasi joogi doonaan iyo in kale laakiin sida ka muuqatay Ciidamadan waxay u ekaayeen kuwa Saldhig halkaas ka dhigtay.

www.ceegaag.com

webmaster@ceegaag.com