Cuqaal,Ganacsato iyo Waxgarad Reer Buuhoodle ah oo la kulmay Madaxweynaha Somaliland Daahir Riyaale Kaahin.

(Hargeysa, March 18, 2008 Ceegaag Online)        

Madaxwaynaha Somaliland Mudane Daahir Riyaale Kaahin ayaa habeenkii xalay ku qaabilay Madaxtooyada Magaalada Hargeysa ergo ka kooban 25 qof 00 Reer Buuhoodle ah kuwaas oo isugu jirey Cuqaal, Ganacsato iyo waxgarad kale.

Ergadan oo uu hogaminayey Caaqil Cabdullaahi Xasan ayaa BBC-da laanta Af-Somaliga u sheegey in Madaxweyne Daahir Riyaale Kaahin ka aqbaley in uu sii daayo Maxaabiistii Somaliland ka qabatey Deegaano ka tirsan Goboladda Sool & Cayn.

Caaqilkan ayaa sheegey in Madaxweyne Daahir Riyaale kala hadleen xaaladaha ka jira deegankooda kuwaas oo ah dhinaca nabad galyada, Abaaraha iyo Biyo La’aanta ka jirta qeybo ka mid ah Gobolka Cayn.

Caaqil Cabdulahi Xasan ayaa sheegey in Madaxweyne Daahir Riyaale isku afgarteen in dhamaan la sii daayo Maxabiista dagaalka lagu qabtey iyada oo tiradooda tahay 91 Maxbuus.

Madaxa xubnahaan la kulmay Madaxweyne Daahir Riyaale ayaa sheegey in Maxbiista xaga Bariga [ Puntland] la saari doono diyaarad kuwa reer Sool-na is raaci doonaan waftigaan.

Caaqilka oo la waydiiyey kala qaybsanaanta degaanka Buuhoodle iyada oo labo maamul ka jiraan Puntland iyo Somaliland ayaa ku jawabey in arintaas dhibaato leedahay balse ay tahay xaalada hadda u socdaan deegaanka isla markaana dadkooda wada tashi kala yeelan doonaan arrimaha ay isku afgarteen Madaxweyneha Somaliland Daahir Riyaale Kaahin.

Cabdulahi Xasan oo la waydiiyey waxa ay isku afgarteen maamulka Somaliland ayaa sheegey in ay isla qaateen in Buuhoodle la gaarsiiyo maamulka Somaliland si nabad galyo ah oo xasilooni ku jirto.

Caaqilkaan oo la waydiiyey in dadkii kala qaybsanyihiin oo Garaadadii kuligood maqan yahiin ayaa sheegey in laga wadahadli doono arinkaan dhinaca saxana la raaci doono.         

www.ceegaag.com

webmaster@ceegaag.com