Dad Soomaali ah oo la dilay iyagoo ka gudbaya xadka u dhexeeya dalalka Sudan iyo Ethiopia.

(Qadarif, March 30, 2008 Ceegaag Online)

Wararka laga helayo magaalada Qadaarif ee dalka Suudaan ayaa sheegaya in ciidanka xuduudda ilaaliya ee dalka Ethiopia ay toogasho ku dileen dad Soomaali ah oo ka gudbay xadka ay wadaagaan dalalka Suudaan iyo Ethiopia.

Warka ayaa sheegaya in dadka la dilay ay gaarayaan 4 qof oo seddex ay dumar tahay, waxaana dadkaas ay doonayeen in ay si qarsoodi ah kaga gudbaan xadka u dhexeeya Ethiopia iyo Sudan, hase ahaatee ay ciidamada xuduudda Ethiopia tacshiirad ku fureen halkaas oo ay ku dhinteen 4 qof oo Soomaali ah.

Warka ayaa intaas raacinaya in dad kale oo Soomaali ah ay baxsadeen markii ay ciidamadu tacshiiradda ku fureen kadibna ay galeen xadka Suudaan, iyadoo qaarkood la sheegay in ay iyago dhaaawac qaba ay galeen xadka Suudan.

Dadka Soomaaliyeed ayaa safaro naf hurid ah waxa ay ku aadaan dalalka Yurub iyagoo sii maraya dalalka Rthiopia, Suudaan, liibiya kadibna badda uga sii gudbaya dalka Talyaaniga halkaas oo ay kala kulmaan dhibaatooyin u badan dhimasho.

Dadka Soomalida ah ee ka cararaya gudaha dalka Soomaaliya ayaa sii kordhay sanadkaan markii ay sii baaheen dagaalada iyo dhibaatpooyinka ka jira gudaha dalka Soomaaliya gaar ahaan magaalada Muqdisho iyo qaar kamid ah gobolada Koonfureed ee dalka Soomaaliya.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com