Diyaarado joog hoose ku duulaya oo maanta lagu arkey Magaalada Marka ee Gobolka Sh/hoose.

(Marka, March 18, 2008 Ceegaag Online)

Diyaarado aan weli si dhab ah loo garan waxa ay yihiin iyo cidda leh islamarkaana ku duulaya joog hoose ayaa maanta marki uu horysay lagu arkay hawada magaalada Marka ee xarunta gobolka sh/hoose.

Wararka laga helayo magaalada Marka ayaa sheegaya in diyaaradan ay maanta oo dhan dulheehaabayeen hawada magaalada Marka, iyadoo ay taasi jawi cabsi ah ku abuurtay dadka ku dhaqan magaalada Marka, waxaana dadweynuhu ay isugu soo bexeen waddooyinka si ay u daawadaan.

Dhaq-dhaqaaqa diyaaradahan oo maanta dhan si weyn looga dareemayey gobolka sh/hoose gaar ahaan magaalada Marka ayaan la ogeyn halka ay ka yimaadeen iyo ujeedada ay ugu dul heehaabayaan hawada sare ee magaalada Marka ee xarunta gobolka Sh/hoose.

Dadka qaar ee ku dhaqan magaalada Marka ayaa tibaaxay in ay tuhmayaan in diyaaradahaan ay yihiin kuwa wax basaasa ee aan la wadin islamarkaana ay ka soo kicitimeen maraakiibta mareykanka ee ku sugan xeebaha dalka Soomaaliya.

Maamulka gobolka Sh/hoose wax war ah kama soo saarin diyaaradaha maanta dulheehaabaya xarunta gobolka Sh/hoose ee Marka, waxaana arrintaas ay ku soo beegmeysaa xilli dhawaan diyaaradaha dagaalka mareykanka ay duqeyn u geysteen dad iy xoolo ku dhaqnaa degmada Dhoobley ee gobolka Jubada Hoose.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com