Kooxo hubeysan ayaa xalay toogasho ku dilay guddoomiyihii hore degmada Baledweyne Axmed gobey Cawaale.

(Galgadud, March 17, 2008 Ceegaag Online)

Kooxo hubeysan ayaa xalay toogasho ku dilay guddoomiyihii hore degmada Baledeyne ee maamulka gobolka Axmed gobey Cawaale, xilli uu ku soo jeeday magaalada Baledweyne ee gobolka Hiiraan.

Mas'uulkaan ayaa lagu dilay tuulo la yiraahdo Ceeldheere oo u dhexeysa magaalada Dhuusamareeb iyo degmada guri-ceel ee gobolka Galgaduud, waxaana la sheegay in rag hubeysan ay gaari kala degeen dabadeedna ay ku dileen halkaas.

Dadka ku dhaqan tuulada Ceeldheere ayaa saakay ku waabariistay meydka mas'uulkaas oo yaala deegaanka, waxaana dad u badan waxgaradka tuuladaas oo isqabanqaabiyey ay bilaabeen in ay meyka u soo jiheeyaan dhanka magaalada Baledweyne oo uu ka soo jeeday marxuumku.

Saacadaha soo aaddan ayaa lagu wadaa in marxuumka lagu aaso magaalada Baledweyne iyadoo qabanqaabo aas loogu sameynayo marxuumka ay iminka ka socoto magaalada Baledweye.

Dilka marxuumkaan ayaan si dhab ah loo ogeyn waxa uu salka ku hayo, mana jirin wax xil ah oo uu hayey, waxaana dadka ku dhaqan magaalada Baledweyne ay cambaareeyey dilkiisa, iyadoo Axmed gobey Cawaale uu ahaa nin da' ahaan lagu qiyaasay 60-jir.

Maamulka gobolka Hiiraan weli kama hadlin dilka loo geystay marxuumka iyo haddii ay ka war hayaan ciidda geysatay, waxaase la filayaa in aaska marxuumka kadib ay mas'uuliyiin ka tirsan maamulka gobolka Hiraan ay ka hadlaan dilka Axmed Gobey Cawaale guddoomiyihii hore ee degmada Baledweyne oo xalay kooxo hubesyan ay ku dileen tuulada Ceeldheere ee gobolka Galgaduud

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com