Madaafiic lagu weeraray xarunta Madaxtooyada iyo Madaafiic jawaaab ah oo laga soo riday madaxtooyada oo dad ku laayey suuqa Bakaaraha.

(Muqdisho, March 29, 2008 Ceegaag Online)

ilaa 7-madfac ayaa lagu weeraray xarunta Madaxtooyada ee Villa Soomaaliya xilli uu halkaas ku sugan yahay Wasiirka arrimaha dibadda Ethiopia Seyoum Mesfin oo maanta soo gaaray magaalada Muqdisho ee caasimada dalka Soomaaliya.

Dadka ku dhaqan xaafahada ku dhaw xarunta Villa Soomaaliya ayaa sheegay in ay maqlayeen dhawaqa madaafiic ku dheceysa xarunta villa Sooomaaliya kuwaas oo aan la garan khasaaraha ka dhashay iyo halka laga soo tuuray.

Madaafiic jawaab ah oo laga soo riday xarunta Villa Soomaaliya ayaa ku habsaday suuqa weyn ee Bakaaraha halkaas oo ugu yaraan 10-qof oo shacab ah ay ku dhinteen, waxaana madaafiicdaas ku dhaawacmay dad kale oo aan weli rasmi ahaan la heynin tiradooda.

Madaafiicda ayaa la sheegay in ay badankoodu ku dhecen suuqa Bakaaraha qeybta Raashinka halkaas oo ay dadna ku dhinteen kuwa kalena ku dhaawacmeen, iyadoo dhaawaca dadka loola cararay isbitaalka Madiina ee magaalada Muqdisho.

Wararka laga helayo suuqa Bakaaraha ayaa sheegaya in khasaaraha ka dhashay madaafiicda ku dhacday suuqa Bakaaraha uu intaas ka badan yahay, waxaana suuqa Bakaaraha ka jira xaalad kacsanaan ah iyadoo gebi ahaanba uu istaagay ganacsigi ka socday suuqa.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com