Nuur Cadde "Xukuumadeyda oo kaashaneysa Hay'adaha QM ayaa door weyn ka qaadanaya sidii gurmad loo gaarsiin lahaa shacabka ku dhibaateysan dalka Soomaaliya"

(Addis Ababa, March 27, 2008 Ceegaag Online)

Ra'isul wasaaraha Soomaaliya Nuur Xassan Xuseen (Nuur Cadde) ayaa ka dhawaajiyey in ay wax weyn ka qaban doonaan xaaladaha laga deyrinayo ee ka jira dalka Soomaaliya.

Nuur Cadde ayaa sheegay in xukuumadiisa oo kaashaneysa Hay'adaha Qaramada Midoobay in ay sida ugu dhaqsiyaha badan wax kaga qaban doonaan dhibaatooyinka is biirsaday ee xiligaan ka jira gobolada dalka Soomaaliya, isagoo sheegay in xukuumadiisu ay door weyn ka qaadaneyso fududeynta sidii gargaar loo gaarsiin lahaa shacabka dhibaateysan.

"Waan ku dadaaleynaa sidii loo fududeyn lahaa gargaar la gaarsiiyo kumanaanka qof ee dhibaateysan, xukuumadeyda oo garab ka heleysa hay'adaha Qaramada Midoobay ayaa si wada jir ah u qabanaya arrintaas" ayuu yuri Nuur Cadde.

Nuur Cadde Ra'isulwasaaraha Soomaaliya wuxuu shaaciyey in aad ugu kalsoon yahay in beesha caalamka ay xiligaan il gaar ah ku eegeyso xaaladda cakiran ee dalka Soomaaliya, isagoo sheegay in uu rajeynayo in ciidamo ka soca Qaramada Midoobey ay badalaan ciidamada Ethiopia iyo kuwa Amisom ee jooga gudaha Soomaaliya.

Ra'isulwasaare Nuur Cadde oo hadda ku sugan magaalada Addis-ababa ayaa kulan uu la yeeshay madaxda midowga Afrika waxa ay kaga wada hadleen sidii loo xoojin lahaa ciidamada midowga Afrika ka jooga dalka Soomaaliya.

Ra'isulwasaare Nuur Cadde ayaa shalay ka duulay magaalada Muqdisho isagoo u ambabaxay magaalada Addis-ababa ee dalka Ethiopia halkaas oo uu kulamo kala duwan kula qaatay madax ka kala socotay beesha caalamka.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com