Qoyska mid kamid ah xubnaha Barlamaanka Dowladda Kmg oo lagu sumeeyey Magaalada Beydhabo.

(Baydhabo, March 31, 2008 Ceegaag Online)

Hooyo iyo labo caruur ah oo ay dhashay isla markaana ah qoyska xildhibaan C/rashiid Cali ayaa iyagoo aad ay xaaladoodu u liitaan la dhigay isbitaalka magaalada Beydhabo kadib markii lagu sumaayey raashin sida uu sheegay xildhibaanka.

Xildhibaan C/rashiid Cali oo wax laga weydiiyey arintaas ayaa sheegay in uu tuhmayo in sumeynta qoyskiisa ay ka dambeeyeen dad uu sheegay in uu kala dhexeeyo loolan siyaasadeed inkasta oo aanu xildhibaanku carabaabin cidda ay yihiin dadkaas.

Wuxuu sheegay in la doonayey in sunta isaga lagu khaarijiyo hase ahaatee uu ka badbaaday, balse qoyskiisa ay musiibadu ku dhacday, waxaana uu intaas raaciyey in uu aad uga xun yahay in falka sumeynta ah lagula kaco qoyskiisa.

Qoyska xildhibaanka ayaa iminka lagu dabiibayaa isbitaalka magaalada Beydhabo, waxaana dhaqaatiirta isbitaalka Beydhabo ay sheegeen in xaaladda caafimaad haweeneyda iyo labada caruur oo ay dhashay ay tahay mid aad halis u ah.

Waa markii ugu horeysay oo xildhibaan ka tirsan Barlamaanka Dowladda Federaalka Soomaaliya qoyskiisa la sumeeyo, waxaana taasi ay cadeyneysaa in loolan xoogan uu ka dhexjiro xubnaha Barlamaanka Dowladda Federaalka Soomaaliya.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com