Sheekh Shariif iyo Shariif Xasan oo Labaduba kusugan Dalka Sudan kuna soo jeeda Nairobi si ay ula kulmaan RW Nuur Cadde.

(Khartoum, March 24, 2008 Ceegaag Online) 

Gudoomiyihii hore ee Maxkamadihii Islaamiga Sheekh Shariif Sheekh Axmed iyo Gudoomiyihii hore ee Baarlamaanka FKMG ee Soomaaliya Shariif Xasan Sheekh Aadan ayaa labaduba kusugan dalka Suudan magaalo Madaxdiisa Khartoum.

Labadan masuul ayaa lagu wadaa inay gaaraan dalka Kenya magaalo madaxdiisa Nairobi halkaasi oo ay kula kulmi doonaan Ra'iisul Wasaaraha Somalia Mudane Nuur Xasan Xuseen "Nuur Cade" oo lagu wado in maalinta Jimcaha uu kulankoodu ka dhaco magaalada Nairobi ee Xarunta dalka Kenya.

Warar aanu ka helnay ilo xog agaal ah ayaa sheegaya in labada Masuul ee Mucaaradka ku ah DFKMG waa Shariif Xasan iyo Sheekh Shariif Viisahooda ay ku howlan yihiin Safaarada Kenya ay ku leedahay dalka Sudan iyagoo diyaarinaya qaabkii ay kusoo gali lahaayeen wadankaasi.

Wakiilka Dalka Talyaaniga ee arrimaha Soomaaliya Mr. Mario Raveillli ayaa ku hawlan sidii uu isugu keeni lahaa Ra'iisul Wasaare Nuur Xasan Xuseen "Nuur Cade" iyo mucaaradka dowlada kasoo horjeeda si ay uwadahadlaan.

Dib u heshiisiintaan ayaa ka danbaysay ka dib markii uu Ra'iisul Wasaare Nuur Cade ku dhawaaqay inuu kulamo la yeelan doono dhamaan mucaaradka Dowladda kasoo horjeeda isagoo waliba sheegay inuu la kulmi doono dhamaan macaaradka dowlada Soomaaliya, iyadoo dhawaan dowlada Mareykanka ay ku dhawaaqday in Ururka Al-shabaab ay u aqoonsatay urur Argagixiso.

www.ceegaag.com

webmaster@ceegaag.com