Suuqa Bakaaraha oo loo sameeyey ciidamo gaar ah iyo ciidamadaas oo maanta ka howl bilaabay suuqa Bakaaraha.

(Muqdisho, March 22, 2008 Ceegaag Online)

Ciidamado gaar ah oo ay sameysteen ganacsatada suuqa Bakaaraha ayaa maanta markii ugu horeysay ka shaqo bilaabay gudaha suuqa Bakaaraha ee magaalada Muqdisho.

Ciidamadaan gaarka ah ee ka shaqo bilaabay suuqa Bakaaraha ayaa loo sameeyey darees gaar ah oo lagu aqoosanayo, iyadoo maantaba ay ka shaqo bilaabeen gudaha iyo hareeraha suuqa bakaaraha.

Mid kamid ah ganacsatadii ku howlneyd sameynta ciidamadaan ayaa sheegay in ay rajeynayaan in markaan amaanka suuqa uu wax weyn iska badali doono, isagoo intaa raaciyey in ciidamadaan ka shaqo bilaabay suuqa Bakaaraha ay ka madax banaan yihiin dowladda iyo qolyaha ka horjeeda.

Wuxuu sheegay ganacsadahaas in xaaladda suuqa Bakaaraha oo maalmihi u dambeeyey aheyd mid qasan ay markaan soo hagaagi doonto, isagoo tajo weyn ka muujiyey in ciidamadaan gaarka u ah suuqa Bakaaraha ay wax weyn ka qaban doonaan amaanka suuqa.

Ma cadda in sameynta ciidamadaan ay raali ka tahay dowladda federaalka Soomaaliya iyo in kale, waxaase arrintaas ay imaaneysaa xilli maalmihii inaga tagay ay kulan laahaayeen ganacsatada iyo guddiga amaanka ee dowladda federaalka.

Mas'uuliyiin ka tirsan dowladda ayaa dhowr mar ku celiyey in suuqa Bakaaraha uu kamid yahay goobaha dowladda laga soo weeraro oo ay kooxaha ka horjeeda dowladda isku abaabulaan.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com