Ugaas caan ka ah gobolka Gedo oo ay ciidamo Ethiopian ah ku dhigeen xabsiga degmada Luuq.

(Luuq, March 31, 2008 Ceegaag Online)

Ciidamo ka tirsan kuwa Ethiopia ayaa la sheegay in ay magaalada Luuq ee gobolka Gedo ay xabsiga dhigeen Ugaas aad looga yaqaan gobolka Gedo.

Ugaas Bilow Xassan Xeydar oo kamid ah ugaasyada sida aadka looga yaqaan gobolka Gedo ayaa la sheegayaa in ay xabsiga dhigeen ciidamo ka tirsan kuwa Ethiopia, iyadoo aan si dhab ah loo ogeyn ujeedada ka dambeysa xariga ay ciidamada Ethiopia kula keceen ugaaska.

Ugaaska ayaa la sheegay in ciidamo Ethiopia-an ah oo aad u hubeysan ay ka kexeysteen hoygiisa oo ku yaala degmada Luuq ee gobolka Gedo, iyadoo wararku sheegayaan in dad kale oo ku dhow ugaaska lala xiray.

Warar lagu kalsoon yahay oo laga helayo gobolka Gedo ayaa tibaaxaya maamulka degmada Luuq ay ka dambeeyeen xariga ugaaska markii uu ugaaska dhawaan uu ku gacan seyray in uu beeshiisa ka dhaadhiciyo in ay la shaqeeyaan maamulka cusub ee dhawaan halkaas laga dhisay.

Waxgaradka ku dhaqan gobolka Gedo ayaa si weyn u cambaareeyey xariga loo geystay Ugaas Bilow Xassan Xeydar, waxaana socda dadaalo ay wadaan waxgaradka ku dhaqan gobolka Gedo oo ay ku doonayaan in xabsiga laga sii daayo Ugaaska.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com