Wadada wadnaha oo maanta muddo kadib si toos ah gaadiidka BL-ka iyo dadweynahu ay u isticmaalayaan

(Muqdisho, March 29, 2008 Ceegaag Online)

Wadada wadnaha oo dhawaanahaan u xirneyd ciidamada dowladda KMG ayaa maanta markii ugu horeysay ay gaadiidka BL-ka ah iyo dadweynuhuba si caadi ah u isticmaalayaan, iyadoo aaney wadadaas ka jirin wax dhibaatooyin ah.

Gaadiidka dadweynaha ee isaga gooshi jiray inta u dhexeysa Siinaay illaa KM4 ayaa maanta markii ugu horeysa muddo kadib la arkayey iyagoo dadka u daabulaya inta u dhexeysa Siinay ilaa KM4 halkaas oo muddo badan aaney gaadiidka iyo dadweynhuba isticmaalin, waxaana sidoo kale wadada dib uga howl bilaabay gaadiid kale oo iyagana isaga gooshaya deegaanada kale ee magaalada.

"Waa ilaah mahaddii haddii saakay gaariga iga qaada isgoyska Siinaay uu si toos ah ii geynayo KM4 oo aan muddooyinki ugu dambeeyey waddooyin qarda jeex ku gaari jirnay, waana arrin aan si weyn ugu faraxsanahay ka shacab ahaan" ayuu yiri mid kamid ah dad ku sugnaa isgoyska Siinaay halkaas oo gaadiidka laga raacayey.

Dadka qaarkii ayaa walaac ka muujiyey in ciidamada dowladda ay mar kale ku soo noqdaan wadada wadnaha sidii dhacday dhowr mar oo hore, iyadoo dadka ay sheegayaan in arrintaan ay tahay mid aan sii jireyneynin oo ay ciidamadu dib ugu soo laabanayaan wadada.

Ciidamada dowladd ayaa gelinii dambe ee shalay halkaas ka guuray, iyadoo saakay gaadiidka iyo dadweynaha ay wadada bilaabeen in ay si caadi ah u isticmaalaan.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com