Xaaladda koonfurta Magaalada Gaalkacyo oo ay shalay dagaallo ku dhexmareen labo maleeshiyo beeleed ayaa saaka deggan

(Gaalkacyo, March 18, 2008 Ceegaag Online)

Xaaladda Koonfurta Magaalada Gaalkacyo oo ay shalay ka dhaceen dagaalo sababay dhimasho iyo dhaawac ayaa saaka deggan, waxaana halkaasi ka socda dadaallo ay wadaan nabadoono iyo waxgarad ka soo kala jeeda dhinacyadii shalay ku dagaalamay halkaas.

Wararka laga helayo Magaalada Gaalkacyo ayaa sheegaya in xaalad deganaan ah ay saaka ka jirto goobihii ay shalay dagaalada ku dhexmareen labada maleeshiyo beeleed, iyadoo ay wararku tibaaxayaan in deegaanada koonfureed ee magaalada Gaalkacyo ay weli ka jiraan abaabulo dagaal oo ay wadaan maleeshiyaadkii shalay dagaalamay.

Mid kamid ah salaadiinta Beelaha ku dagaaladay dhinaca koonfureed ee Gaalkacyo ayaa ugu baaqay dhinacyada dagaalamay in ay xabadda joojiyaan oo ay taas badalkeeda waan-waan iyo wada hadal ku xaliyaan, isagoo intaa raaciyey in dagaalku uu kaliya reebayo khasaare ee aanu laheyn faa'iido.

Dagaal shalay ka dhacay meel duleedka kaga aaddan dhinaca koonfureed ee magaalada Galkacyo isla markaana dhexmaray labo maleeshyo beeleed oo isku haya lahaanshaha dhul ku yaala halkaas ayaa waxaa ku dhintay 10-qof iyadoo ay ku dhaawacmeen tiro badan oo dad ah.

Xafiiska Wararka Ceegaag.com Muqdisho, Somalia

Axmed Aadan Ibraahim

axmedmadoobe@hotmail.com

webmaster@ceegaag.com